LEMELERVELD – Toen ik nog werk deut waordeur ik bie mensen in de tuun kwaame, kont gebeurn dei ok welles in un binnentuuntie kwaam.  Wiele waarn daor mooi ant werk en dur stond un kippenhok in die tuun. Daor zaten kippen en un haane in. Tja aans koit ok gien kippenhok neum.  Wiele kreegn koffie toen ut tied daorveur was en haan ut met de baas vant huus over ut gekuukel van de haane.

Die gunk nogal te keer toen wiele daor waarn. Wiele vreugn offe gin trammelant met de buurn kreeg deur die haane. De man zei daorop det as wiele dur last van haan, hij ut wel eem zol oplossen. Hij stond op en leup nor de tuun en umdet wiele bin an de koffie zaten zaagn wiele niet waor offe hen leup. De man kwaam weer terugge en zei det wiele dur gin last meer van zol hem.

Daor waarn wiele wel blij umme. Later kwaam wiele dur achter det hij wel heel resoluut ut lawaaiprobleem had oppe lost. Hij had de haane gewoon de nekke umme dreit. Det had van oons noe niet ehoeven, mar wiele wussen ok nie wat de buurn vant gekuukel von. Buurn kunt daor heel meuluk over doen, det ze zelfs de politie dur bie slept veur geluudsoverlast. En um goeie buurn te haoln, muj dut mangs wat veur over hem.

Ton