Uutkieken wai doet - Foto: Ton S
Foto: Ton S

Uutkieken wai doet

LEMELERVELD – Ai bie luu komt die niet al te gaonde meer bint, kunt die oe vraogn ai ok eem koffie wult gaon zetn. Ik bin det welle went det luu ut te veule gedoe vindt um zelf koffie te zetn en ut wel makkeluk vindt as un ander ut dut. Dus ik begin deran en kan mie der meestal goed mee redden. Ik rop gewoon allerlei kasten en lades lus en kan dan zo vinden wak neudig hebbe.

Ik wul ut ok nog netties doen en zuuk un dienblad  um de koffie nor die luu te brengn. Ik wul niet gaon slatern as de koffie derover hen giet plumpen biet loopn met de kuppies in de hande.  Dus op ut dienblad met de kuppies en noe nog wat zeuken nor wat bie de koffie. Kiekn in de lades en daor lag un stuk cake, waor ik un paar plakke afsniede.  Die leg ik ok op ut dienblad, mar ik had die cake niet goed bekeken.  Ik krieg det later ok te heurn, ak de koffie met de cake bie die luu neerzette.  De cake was a beschimmelt en die luu vraog mie waor ik mee bezig binne. Ok hun wul vergiftigen met die bedurven cake.  Eigenluk muk mar rap maakn dek weggao ak hun allenig mar die olde rommel veur wul zetn. Ik heb as commentaar dek better had mun kiekn wak hun veur hadde zet.  Mar as hun niks aans in huus haan dan allenig mar olde beschimmelde cake, kunt ze det verwachten.  Ik mosse toch mar better gaon zuukn nor iets aans en ja ik vunne nog un pak kuukies, die wel goed ekeurt wun. Zo wun ut toch nog un kuppie koffie met iets lekkers derbie, zonder det un aanslag was op hun.

Artikel delen: