LEMELERVELD  – Etten daor kuj lange over naodenkn of gauw aofhandeln. Mar an taofel kunter ok hele gesprekn evoert wurn. Ast mar spontaan giet en niet praotn um te praotn.  Opgegruit in un groot gezin bink ewent biet etten dei der bie mossen ween biet opscheppen aans wast op. Veur de persoon diet klaor emaakt had, waster nie vake te heurn hoe offet etten was.

Allenig ast slecht was of anne braden, kreeg die ut wel te heurn. Twas vake ok gauw nor binnen proppen en dan rap van taofel, want helpen met opruum of afwassen was der nie bie. Teminste der dachten ze ait, tutdet ze der bie eslept wurn deur de olderen. Un breur kreeg kundigheid an un deerntie.

Die keek wel un bettie raar op toen die zag hoet dur bie oons an toe gunk. Spuln die deur egeem mossen wurn an taofel die gooiden wiele mekare gewoon toe. Det scheld un bult tied ja. Det deerntie was heel wat aans ewent an taofel en wol mien breur daor un bettie in stuurn.  Dus toen hij iniens begon te zegn teegn mie moe dette lekker egetten had, keken wiele hum allemaol vreemd an offe misschien wat had oppe loopn.  Zukke taal haan wiele nog niet vake heurt. Hij dacht zelf dette goeie punten had escoort bie zien vriendinnegie, want die zat ok an taofel natuurluk.

Toch is ut zegn dei ut etten lekker evun hebt helemaol niet zo verkeerd. De kok kreg det graag te heurn en zal dan ok probeern um de volgende keer weer heur of zien best te doen um weer iets op taofel te zetn wat waardeert wurd. As dur nooit watte zegt wurd kan ut etten gewoon op taofel egooit wurn, want niemand zol der wat over zegn. Mar ast allemaol opgiet kuj det ok as waardering zien.  Ai meer as de helfte terug kriegt, weetie det niet zo goed bevaln is. Um toch te laoten heurn dei ut gebuffel in de keuken waardeert, gef an dei der kiek op hebt det nie allemaol vanzelf op de borden kump. Un blij mense zal ut met meer vreugde doen as die weet det ieder dan tevreene is.