LEMELERVELD – Assie noe graag op kamers wult, is det bienao niet meer te betaaln. Ie wult toch wel graag ens aans woon as bie oe va en moe. As die genog ruumte in huus hebt kuj dan probeern um un ruumte veur oe zelf te maakn, zodei niet meer bie menare op de lippe zit.

As dan un logeerkamer, die allenig mar af en toe gebruukt wurd, umme tovert kan wurn as oen eign zitkamertie met eign televisie zol det un mooie oplussing ween. Dus ut logeerberre uitmenare haalt en in de opslag. Noe haj eheurt det iemand nog un bankstel over had en det kump dan merakel goed uut. Ie kon zelfs nog kiezen; un tweezits of driezits. Un driezits daor kuj better op lign, dus dan mar probeern det geval nor boom te  kriegn. Dan mossie ok nog un dreitrappe op en bie ut probeern of det wol, moster alle kanten oppe dreit wurn um te kieken hoe of det noe kon. Mar helaas ut passen niet. Veurdet de banke noe ummeruilt wurn veur de tweezits gung wiele eem kieken hoe ut ok nog aans kon. Bie un andere kamer op dezelfde verdieping as de logeerkamer zat un groot raam in. Bie ut naomeetn zaagn wiele det de banke daor zat deurhen kon. Noe met un ledder teegn de muure kon wiele de banke zo  umhoog duwn en dan deur ut raam nor binnen haaln. Aster dan iene onderan over de ledder ging duwen en un ander vanuut ut raam met touwen helpt met ut nor boom trekn mos det kun.  Zo gezegd zo gedaan en zonder verdere trammelant kreegn wiele de banke in de logeerkamer. Noe kuj nog andere ding derbie zeukn um ut veur oe zelf gezellig te maakn.

Ton