LEMELERVELD – Un vrouwe waor ik a jaoren in de tuun ehulpen heb, mos iniens nor un verpleeghuus umdet ut allenig woon nie meer kon. Ik bin in det verpleeghuus un keer op bezuuk ewes bie heur. Zie kreeg genog anloop en toen ik der ware was zie niet goed aanspekbaar. Ik gao daor niet un bettie veur de vuute van heur familie loopn en waar der un tied nie meer ewes.

Noe kreek te heurn det ut mense dacht det ik kwaod op heur was umdet ik zo’n tied niet meer bie heur ewes ware. Dus ikke der mar weer un keer hen um uut te legn weurumme ik mie nie meer heb laoten zien. De vrouwe gink noe hard achteruut en zie wult al op un hospice an. Un andere vrouwe beln mie op det ze un probleem met un deure had, want die kreeg ze niet meer lus umdetter un gordien tussen ekom was. Dus ikke derhen en noe bleek det ze ut slot niet meer kon ummedreien. Zie had last van heur polsen en umdet ze alleen woont zat ze met det probleem. Ut bleek det ze verleegn zat um aanspraak. Dur was un bult gebeurt de leste tied en det wol ze graag kwiet. Luustern kank ait en ai dan weet dei iemans daor meehelpt, mut det toch kun. Ik had ok nog epland dek iemand zol helpen bie zien bijen um de boel klaor te zetten veur ut honingslingern. Dur ston un bulte kisten met volle raten die allemaol nog behandeld mossen wurn. Un zeune van die kerl was bezig met jappel rooien en veurdet de jappel via un transportband in un kiste kwaam mossen eerst de grustossen der tussenuut ehaalt wurn. Ai det allenig mossen doen zol det machtig lange duurn. Zie vreugn mie ok daor bie wol helpn en zie maakt mie de pisse nie gauw lauw. Dus ik ben mar eem gon helpn en gelukkig kwaam dur nog meer helpen. Zo zaggie det veule handen ut werk aorig lichter maakt. Deurum bleef dur ok nog tied over um alles weer netties op te ruum en an te keern.

Ton