LEMELERVELD – Kep is eheurt van un kerl die bie iemand in de tuun bezig was. Dur mos un bult gebeurn en det zol dan ok un tietie duurn. De mensen waore bie in de tuun was, mossen un tietie ens aans hen en zoln un poosie weg bliemn. Ut vertrouwn met die tuunman  was nog niet zo goed oppebouwt det ze gelieke alle deurn lus leuten.

Zie haan wel in schuure un kanne koffie klaore zet. Det was dan wel weer aorig van hun. Toen de tuunman steurig bezig was mosse iniens neudig pissen van al die koffie. Dur was un bos kurt bie die tuun en dus konne daor gaon wildplassen. Zo die druk was noe mooi weg en konne mooi verdan. Later kreege un andere druk en det zol wel niet vake gebeurn mar hij mos noe gaon wildpoepen. Hij kon niet nor de wc, de deurn zaten ja dichte, dus ut bos mar weer in. Daor in de volle natuur konne ok wel blaagies vin um de boel aof te veegn. Hij kon zo met zien donatie de bos helpn better ter grujen. Noe wasse ok van die druk offe kom. Hij hatter mar druk mee. Wildplassen det mag niet en ie kunter un bonne veur kriegn. Hoe det zit met wildpoepen det week  nie, mar asse oe betrapt zult ze wel iets vin um oe te laoten betaaln daorveur. De wet zal ons een poepie laten ruiken.