Ut zal oe mar gebeurn

LEMELERVELD – In disse tied kump ut nogal is veur dei mist hebt. Ai dan met de auto vort mut, kan de mist mangs zo dikke ween dei gin zak meer ziet. Op weegn waor as gien streepn of lanteernpaoln bint, kuj de weg helemaol niet meer zien. Veurdeit weet stao ie iniens in de berm of nog erger in un sloot of teegn un boom.

Zaggies an doen is dan ut beste, zodei nog op tied kunt remn ast mis giet. Ut mooiste ist aster un andere auto veur oe rijdt, want dan kuj zo achter de achterlichten van die auto an riedn.

De achterlampen van die auto bint un mooie hulpe um de weg te vin. Zo hek is un verhaal eheurt det iemand ok bie dichte mist achter zo’n paar achterlichten an reed. Ut ging merakel mooi en toen iniens knapn de achterste auto op de auto van die achterlichten.

Dus de chauffeur van de achterste auto stapte kwaod uut en leup nor de chauffeur van de veurste auto die ok was uute stapt. De kwaode chauffeur vreug weurum in hemelsnaam de andere chauffeur noe estopt was. Kreege as antwoord: “Mag ik mien eign auto ok nog in mien eign garage zetn?”

Ton

Artikel delen: