Eem opletten - Foto: Ton S
Foto: Ton S

Eem opletten

LEMELERVELD – Dur zat un echtpaar in un restaurant um te gaon etten. Ze bewonderden ut gebouw, wat un olde boerderije wes was. Ze haan ut mooi verbouwd as restaurant. Dur zat un bult volk a bin te bunkern. Ze vreugn ofter nog ruumte was veur hun. En ja heur bie un raam waster nog un teufeltie veur hun. Toen ze neer eploft waarn kwaamp de bediening ofter nog wat te drinkn veuraf neudig was.

De man nam un kuppie koffie en de vrouwe wol liever un kuppie thee. Koffie kriej zoas altied, mar bie de thee kriej dur ok nog un bult soorten thee bie. Daor muj dan uut kiezen. Eerder was det veul makkelijker, dur was mar ien soort en daor mossie ut mar mee doen. Noe kriej un bult soorten en bie ut kiezen kant lange duurn. De koffie van de man was a bienao kolt veurdet de vrouwe iets efun had. De soorten thee zaten in trummelties en de vrouwe keus un trummeltie uut. Ze schepte wat theebladen in heur kuppie hiet water. De man zag det en vreug weurum zie ut zeefie niet gebruukte.  De vrouwe had det zeefie helemaol niet ezene en noe zat ze met un kuppie vol met theebladen int water. Det kon ze met goed verstand niet meer opdrinkn zonder dei theebladen in de mond kriegt. Dus zie ant schepn met un lepeltie um de theebladen der weer uut te vissen. Toen de bedening later met de menukaarte kwam, zag die hoe de vrouwe met heur thee ant knooien was en wol wel eem un nieuw kuppie water zonder theebladen ophaaln. Mar de vrouwe zei det ze de meeste theebladen dur al uutehaalt had en det ze zich der wel mee kon redn zo. Toen de lunch daornao kwam maakte det un hoop goed.

Ton

Artikel delen: