LEMELERVELD – Pas wurn ik ebelt ok bie iemand ut onkruud  wol schoffeln, zodet ut der better zol uutzien in de tuun. Ikke dren en ant schoffeln en ik waas al un schoffie bezig. Verderop was un oldere vrouwe ok in heur tuun bezig. Zie keek nor mie en reup: “Zo Bertha ok bezig in de tuun?” Ik dache dek ut niet goed eheurt had en leup eem nor die vrouwe of ze mie noe wol beledigen of zo.

Ik ziee der noe niet echt uut as un vrouwe, dunk mie. Ut kon natuurluk ok det de vrouwe neudig un andere brille mut hem of zie had net un grappie maakt. Want dan mos ik eem goan roln vant lachen um de humor van heur te waarderen. Ik zag det de vrouwe op de kniene onkruud ant uutroppen was en ik had toevallig mien schoffel met enum. Dus ik zei det ut met un schoffel veul rapper giet en ie spaort de rugge.  Ik wol heur wel helpen deur un stukkie te schoffeln en uutharken. Ik wasse toch bezig en hek ut hele stuk mar edaone. Ut gunk wel aorig rapper volgens de vrouwe en vund ut goed van mie dek heur zo hulpen hadde, mar zie zol toch opheur eigen manier ut onkruud bleim uutroppen. Zie hatter tied zat veur en dan bliefie ok nog mooi bezig. Det was ik helemaol met heur iens, zolange ait kunt mujt ok gewoon doen. Ik heb het met heur helemaol niet ehad over det ze mie veur heur buurvrouwe anzag, asse mar kan zien wat ut onkruud is en de planten, aans wurd un kale bende in heur tuun.