LEMELERVELD – Kwas ens de boel ant opruum um ut weer toonbaar te maakn. Ai un terras hebt mut det wel bie ehaoln wurn, zo detter gien bulten blad kump te lign. Ok kunter in de oprit koeln en gaatn kom en ast dan reegnt staot daor ait plassen. Aster dan luu deurhen loopt kriegt die natte voetn.. Um det te veurkom muj det repareern.

Dan mutter stien uut en zand deronder eknooit. Aster int grus dernaost ok un gat zit muj daor nieuwe grusplaggen in doen, zodet daor ok gien water kan bliem staon.  Ai det allemaol trechte hebt en ie blaost ut  blad ok nog eem weg zalt dur heel aans uut zien. Ai dan ant opruum bint, kant ween det iemand bie oe kump um te vraogn oi al koffie ehad hebt. Dan zeggie niet gauw nee  en as det wel zo zol ween mut die kerl allenig an de koffie en det wuj veurkommen. Bie ut koffiedrinkn heur ie det die kerl nog meer ideeën hef watter nog gebeurn mut. Ut grus was pas emeit en dur waarn un paar paoln bliem lign int grus.  Noe mossen die paoln weggehaald wurn aans zoln ze bliem lign en ast grus dan weer  egruuit is en ze gaot weer meien jaagd ze de grusmeier an stront. Ai  det kunt veurkommen deur de paoln op te ruum zol det weer geld bespaorn.  Verder mog de rommel, die was bliem lign bie de verbouwing, ok wel opperuumt wurn. Ut zol dur dan glieke better uutzien en dan was die kerl ok weer tevrene.

Ton