De zolder - Foto: Ton S
Foto: Ton S

De zolder

LEMELERVELD – Dur is un plaatse waor assie niet vake komt of waor ie spuln neer gooit um ut uut zicht te hem. Ai ut beneden op de werkvloere laot lign kriej a gauw de name van rommelboer. Dus wel bewaarn, mar uut zicht. De tied um ut dan op zolder netties  op te bergen ister vake niet, dus gooi mar un bult niemand diet zut.

 

Ai dan toch is un keer daor op zolder de boel wult opruum stoj der van te kieken hoeveule spuln aij hebt en ok hoeveule rommel. Zoas dekens die ait mar op un bult egooit bint en de moezen von det wel mooi. Dan kon die ok us lekker slaopn. Noe bin ie zuunig ewes met ut bewaarn van dekens mar ie ziet det dur al heel veule kapot evretten bint deur die pokkemoezen. Noe maagt ze asnog weggegooit wurn. Ok lig overal holt want hier ligt ut dreuge en dur us noe veul vraoge nor brandholt dus kant ok nog wat oplevern. Ie zult ok dingn teegn kom waorvan ie niet meer wus dei ut nog had en ie hebt de ruumte dus lig ut niemand in de weg. Det is dan ut mooie van un zolder, niemand zut ut en det gef un opgeruumt geveul.

Ton

Artikel delen: