LEMELERVELD – Met de chauffeurs van de buurtbusse gung wiele met de busse nor Veenhuizen. Wie begun met koffie en cake. Daornao wun wiele innedeelt in drie groepn, want de busse hef kats volle zeten. Ai dan wat wult meekriegn van de gids muj niet met un te grote groep ween. Dur wurn vetelt det un militair un plan had teegn de armoede. Hij hef in Drente un bult grond ekocht umdet daor niet zo duur was vanwege de veengrond.

Hij leut un opvang bouwn veur weeskinder, en die kon dan mooi ant werk. Armoei kump ai niet werkt, dus as die kinder oppevang wurd en un dagritme volgt met werken, etten en slaopn wurd det un goeie leerschole. De verdere verzorging kump dur dan bie. Dur was un ziekenhuus, un apotheek en zelfs un brandweekazerne int durp.  Zo kwaam meer gebouwn met allerlei functies. De brandweer hef echter un keer un gebouw laoten afbranden, umdet de melding op 1 apr was en ze dachten det un aprilgrappie was.  Toen der niet genog weeskinder waan bint de bedelaars en landlopers der bie ehaalt veur de opvang.  Ut wurn allemaol te duur en de gebouwn en terrein is verkocht an de overheid. Later kwaam justitie derin en die maken dur gevangenissen van . Ut wurn drie soorten gevangenissen. Veur alcoholgevaln, de opvang veur verzekerde bewaring. Det is veur dei berecht bint en de derde soort un strafopvang en det is veur zwaore gevaln die in ander gevang wat uutvretten hebt. De gevangenen mochten ok ant werk int durp en dur wurn ok huussies ebouwd veur hun.

An de huuzen kuj zien wat van soort mensen dur woont. Ai oe beste deun en ie kreegn promotie mossie ok verhuusn nor un ander soort huus. Ai met pensioen woln moggie daor ok nie meer bliem woon. Zelfs de kleern die an de botten haan was veur oen functie aans. Ie kon zien an de kleern wat offie door te zeukn had int durp. Ai dan iemand woln dusrimineern koit an de kleern zien wie ai mossen hem. Rond de middag kreegn wiele un lunch en mochten wiele ruiln um dan iets aans te bekiekn. Ie kon kiezen met ut bezuuk van un bierbrouwer of nor ut museum. Um oe midden op de dag al te laoten voloopn leek mie niet wat dus nor ut museum met de gids. Toen det bekeekn was kon wiele met de busse weer terugge en ut wurn aofe sleutn met un borreluurtje met diner. Het was kats veur menare.