LEMELERVELD – Iemand was bezig met un onderzuuk, waore dingn wol weetn van un boerenfamilie. Dus die kerl dren en kump bie jongens van die familie die gewoon deurgung waor assie mee bezig waarn.

Zie waarn noe ant kuilvoer haaln met trekkers en anhangwaagns. Dur ston nog meer anhangers te wachten tut ze an de beuerte waarn. Ze zaagn iniens un kerl in burgerkloffie loopn. De jongens in hun overal dachten eem un grappie uut te haaln. De kerl was met zien fietse kom en toene met un paar jongens bie un persbult ant praoten was, naam un paar andere jongens zien fietse mee die ens was nerezet. Ze knupten die fietse an un anhanger vaste, deur de trekboom van de anhanger op de bagagedrager te knuppen.  Toen de kerl was uute praot konne zien fietse nie weervin. De jongs begon te lachen toene zien fietse an de anhanger zag staon. Hij leup derhen en zag toen det zien band lek was, de anhanger was toch te zwaor um die op de bagagedrager mee te slepn. Hij begreep det ze un geintie haan uute haalt met hem, mar det was uut de hand eloopn deur vernieling van zien fietse. Hij woon int durp en det was un heel stukkie fietsen of loopn watte noe mos. De jongs zeien det ze det nie haan bedoeld en ze zollen hem wel met de fietse nor un fietsenboer brengn met de trekker en un anhanger. Ze zoln de reparatie betaaln en dan konne met un nieuwe band weer op huus an. De fietse wurn op un anhanger egooit en de kerl mog mee op trekker nor ut durp. Noe niet met de fietse mar lekker op trekker op huus an.

Ton