LEMELERVELD – Holt kan mangs helpn. Un kerl hef un lappe bos bie zien huus. In dat bos ligt un bonke takken die der aofevaln bint. Det is veur veugelties en insecten mooi spul um in of onder te kroepn.  De man hef int huus un holtkachel en ok un gaskachel veur de cv. Met de holtkachel kanne de boel mooi warm haoln en ok goedkoop, umdet de gaspriezen noe oarig hoge bint en dan hoeft de gaskachel niet an.

Asse noe ut brandholt uut de bos haalt kanne det mooi opstoken. Noe mosse dan wel ut holt zaagn of kloven zodet ut past in de kachel. Hij vreug mie okkum eem wol helpn biet anslepn van det holt. Ik had un kruuwaagn volle laden en hij kwaam kieken watter allemaol op zat. Hij zei dette gien naoldholt derbie wol hem. Daor zat hars in en dan krege un bende in de kachel. De man gunk ant zaagn en  ik heb un bult zaagholt annevoert. Hij was mooi ant zaagn en ik leutum mar verdan gaon. Ik kon nog wat kloven um hem verder te helpn, want de man is ok gin jonge kerl meer. Al det brandholt mos ok nog int holthok kom waor ut dan verder kon dreugn en veurt griepn was. Zo brengt die bos ok nog wat op.

Ton S