LEMELERVELD – Teegnwaorig hebt ze van die mobiele telefoons. Det bint mangs handige dingn. Mar ai die op zak hebt umdet ze mobiel bint, muj der wel veur oppassen det ze wel in de zak blieft zitn ai ze niet neurig hebt. Tis mie al is gebeurt dek ut apparaat in bustzak had zitn. Ik stond bie un viever en wol eem wat uut die viever haaln en det kon ok zat ak op de hurken was gaon zitn.

Ik beugn mie echter veuroaver en ja heur daor sodermietern mien mobieltje in de viever. Ut was un bedrijfsmobieltje, dus ut zol mie gien kapitaal gaon kosten um un ander weer te kriegn. Noe was ut mooie vant geval det de baas vant bedrief naost mie stond en ut zag gebeurn. Hij wol mie net de konte volscheldn umdet ik zo stom waase um niet nao te denkn det mien mobieltie wellis int water kon valn ak mie veurover beug boom un viever en mien burstzakkie niet goed dichte had.  Veurdette begon te scheldn wolle zelf snel mien mobieltie uut water griepn en beug zich veurover. Hij had zien eign mobieltie ok in de burstzak en ja heur zoaj kunt bedenkn, toene zich veurover beug plumpte zien mobieltie ok in de viever.  Zien gescheld teegn mie hek toen niet meer eheurt. Mien mobieltie kreeg noe gezelschap en kon ze met zien beiden vant water genietn.

Ton S.