LEMELERVELD – Ai voetbal op de televisie gaot kieken, ziej det speulers zich mangs machtig anstelt asse ant speulen bint. Asse deur un teegnspeuler anne pakt wurd en de balle is offepakt, kant gebeurn det ze bie un sliding geblesseerd wurd. Die speulers bint mangs net acteurs assie de scheidsrechter wult doen geleum det ze veul piene hebt um watter net gebeurt is.

Ai dan de beelden terugge ziet bint ze mangs helemaol niet eraakt, mar ze doet as of ze de biene kats kapot hebt. Nao hun voetbalbaane kunt ze ait nog werk vin biet theater of de filmwereld, want ze bint goed in de slachtofferrol. At ze dan gin vrije schup kriegt bint ze rap weer op de biene. Tis wel zo det de voetballers rondloopt met van die staoln noppen en ai daormee un schup teegn de baste kriegt bij daor niet blij mee. Ie kunt hellig ween en oe dan as un biest gaon gedraagn, mar tis hun vak en dan kuj dur van uut gaon dei mekare niet lamlendig gaot schuppen. Tis mar un spellegie, mar het hef noe met zoveul geld te maakn det niet mooi meer is. Ie heurt veule over gokn en ummekoopn en det verpest un bult. Ut wereldkampioenschap is noe net ewes en dan kan de voetbalpruttel weer uut de winkel en de kaste in.

Ton