LEMELERVELD – Dur waarn van die telefoons diet ok nog deun aster iniens gien stroom meer was. De telefoons met un vaste lijn had niks met stroom te maakn. Ai mun beln veur hulpe en det wul niet, umdet de modem van oen mobieltie niet meer dut, hei un probleem. Bie brand kuj de brandweer niet beln en zal de bende aoffikken.

Nog erger kant ween ai medische hulpe wult hem, as die niet kump kant dooien oplevern. Mense kunter gedoe mee kriegn, mar bieste ok. Un boer die helemaol modern bezig was met melkrobots en zo, kreg op zien mobieltie un melding aster in zien melkstal iets niet trechte is. Deur stroomstoring krege noe gien melding det deur die stroomstoring zien melkrobots ok niks meer deun. De koeien zaten noe met kats volle uiers. Die bieste waarn ewent um geregeld de robots bin te wandeln um van de melk aof te komn. Noe haan ze last van stuwing en de boer mos noe verstoppertie gon speuln met zien koeien. As zien koeien hem zol zien in de stal, zoln ze begin te bleern um an te geem det ze van de melk aof woln. As de koe niet regelmatig emulken wurd kan de productie minder wurn. As de koe met volle uiers blef rondloopn kanne zichzelf dreuge zetn en dan levert die koe niks meer op, mar blef wel gewoon deurvretten. Met de hand gon melkn zol un oplossing kun ween, allenig  de stalinrichting is noe zo det zoiets meuluk wurdt. Ok met de aantaln vee die dur noe loopt kriej dan un pense werk. Dan toch mar hopn dei gauw weer stroom hebt, want un bult agregaten bint al nor de Oekraïne.

Ton