Un zeiltie dur aof en dur weer op - Foto: Ton S
Foto: Ton S

Un zeiltie dur aof en dur weer op

LEMELERVELD – Ik wurn ebelt ok bie iemand wol gaon bladruum. Wiele spreukn de dag aof det ut uutkwaamp. Later beln die persoon mie weer op det ut weer dur nie best uutzag op de geplande dag en ze wol mie later wel teruggebeln. De weersver- wachting kump niet ait uut, want de geplande dag was best goed weer veur bladruum.

 

Toen die dag al bienao offe loopn was, beln de persoon mie weer terugge det ut de volgende dag wel kon. Terwijl ik bezig was met bladruum, wurn ik deur iemand anders ebelt ok nog eem tied had um te helpn. Ut kwaamp noe nie uut dus, mar ant ende van de dag zok wel langskom um te overlegn ok nog wat kon doen.  Toenk kwam anweien wasse niet thuus, mar hij was nor un zeune van hem. Ikke nor die zeune toe en toen ik die zeune bie zien huus zag loopn, vreug ik hem waor zien vader was. Die zol in de kantine rondhang, mar hij vreug mie ok hem nog eem kon helpn. Dur lag un beste bult jappel en die zoln ze morgen koom ophaaln. Op die bult jappel lag nog un laoge stro onder de zeiln die dur oplaagn.  Die zeiln en ut stro moster noe aofe haalt wurn en asse det allenig mos doen zolt det un beste tied duurn.  Ut zol zo donker wurn. Wiele hebt eerst de zeiln dur aofehaalt en begon te spitn met ut stro.  Toen de stro duraof was mossen de zeiln dur weer over umdet ut ’s nachts zol gaon reegn. Ai de volgende dag natte jappel mut laden giet det minder mooi dan wanneer ie dreuge jappel mut laden.  De jappel wurd verkocht op gewicht, dus ai dan van die natte pruttel hebt, mut de koper ut gewicht vant water derbie betaaln. Daor zolle wel niet blij mee ween. Dan kanne ok zegn dei de natte bende maagt haoln.

 

Ton

Artikel delen: