Tja, ast niet meer dut, dan dut niet meer - Foto: Ton S
Foto: Ton S

Tja, ast niet meer dut, dan dut niet meer

LEMELERVELD – Assie gebruuk maakt van techniek, ist wel leuk as die techniek blef doen waj dur van verwacht. Dit is un rare manier um te zegn dei autopech hebt. Ik waase ant werk en dan heb ik mangs de auto neudig. Midden in Dalfsen knapn dur wat kapot an de auto en hak gien gank meer, de versnelling deut ok niet meer.

 

Dus ikke deruut en schoeven nor un parkeerplaatse, want ik kon de auto slecht miln op weg laoten staon. Ik ben zelf atechnisch, mar had toch un vermoeden watter noe kapot was. Ik dache det un andriefasse was offeknapt, mar ut kon ok heel wat aans ween. Noe mar hoppen det ut niet un dure reparatie zol wurn, want mien auto is al un old biesie (van 2005) anders zok toch want anders mutten zuuken. k ben lid van de ANWB, mar ak die zol beln kunt die ok niks aans dan mie nor un garageboer slepn.

Dus kank die garageboer ok zelf beln offe mie kon ophaaln met un autoambulance. Zo ezegd zo edaone en ik heurn det wel eem kon duurn veurdette bie mie zol ween. Mien auto stond niemand in de weg en dur was kurtbie un supermarkt waor ik binnen met un kuppie koffie kon wachten op de garageboer. Toen denne kwaamp heffe mien auto op zien autoambulance slept en kon wiele nor zien bedrief toe, waor ik un leenauto krege en verdan met mien werk. De garageboer zol met mien auto an de gank en ik kreeg wel te heurn asse de boel weer trechte had. Dan konk weer verder met ut olde biesie.

Ton

Artikel delen: