LEMELERVELD – In sommige families ister un bonke trammelant en kunt ze menare niet meer luchten of zien. Mar dur bint ok families waor dur gien gedoe is. Det is veul better, want ie kunt niet zonder familie. Ie komt ze ait weer teegn. Biet older wurn, loopt mensen vake teegn allerlei klachten an.

Ik kenne un kerl die teegn zien pensioenleeftied met allerlei gedoe kreeg te maakn. Hij heurn dette un tumor in zien heufd had en daor hadde heel niet umme vraogt. Noe mosse probeern um daor wat an te doen met bestraaln en medizien. Toene nao enkele jaorn behandeln te heurn kreeg, det ut niet veule meer uuthaaln mosse dermee kapn. Die kerl hef zeven breurs en aij biem menare in de buurte woont kuj makkeluk an kom zakn um eem bie te proatn.  Mar as die breurs bie hum wult komn mut ze un paar uur in de auto of sommigen zelfs met ut vliegtuug komn.

Tja, mangs muj dur wat veur over hem. Vier van die breurs klumn in de auto en gung bie hun oldste breur op bezuuk. Det bezuuk kon niet te lange duurn umdet de oldste breur ut niet te lange kon volhaoln. De vier bezuukende breurs waarn nog niet eerder zo saam op pad ewes en bint metiene ens gaon etten. Bie ut koffiebezuuk bie de oldste breur wurn dur un hoop geouwehoert en kon de oldste ok nog meelachen.  De bezuukende breurs haan ut gevuul det hun bezuuk gewaardeert werd en daor doeit toch umme?

Ton