DALFSEN – Afgeloopn zoaterdag oamp was dr een heel mooi feessie veur mien leeftieds categorie. Ik zat helaas met mien poot omhoog veur de kachel, heb een klein ongelukkie ehad.

Bej ut Witte Peerd in Nejleusen was een feessie met 2 olde diskjockeys van vrögger. Doar had ik ok graag henn ewilt, maar ja, zat eem teegn.

Afgeloopn zundag sprak ik Bennie Bang, iederiene kent hum, ok een old diskjockey van vrögger. De volgende keer giet hej doar drejn, zegt hej. Hej heff weh een groot probleem sinds zoaterdagoamp.

Bennie is zo kaal as een biljartbal en is dus zoaterdagoamp ok bej det feessie ewest. Bennie fietst altied völle en teegn de kolde heff hej een hele lange dikke jasse en meest een pruik op sien kale kop. Zoaterdagoamp was t hum te kold umme te fietsn en heff hej een taxi besteldt. Hej is buutn veur t cafe goan zittn, wachn op de taxi. Op een bankie, jasse dicht en pruik op sien kale harsens. Echter duurn nogal eem en hej is in slaop evalln, toen de taxi eindelijk kwam en hum wakker maakn was sien pruik vot.

Darumme een oproep, wie wet doar meer van?

Woar is de pruik van Bennie?

Noe dus gin poes kwiet en poes evundn maar pruik kwiet en terugge!!!