LEMELERVELD – In un auto kuj op allerlei maniern riedn. Soms machtig onbenullig of ontiegeluk hard. Det muj dan ok helemaol zelf weetn, mar dan muj ok weetn dei daorveur epakt kunt wurn. An de andere kante kuit ok rustig an doen en dan hei de tied um meer umme oe hen te kiekn.

Ie zoln zegn deu dan meer van de natuur kunt genieten, mar det klopt niet want de auto heurt kats niet bie de natuur. Ie kunt dan ok better zegn: genietn van de wereld umme oe hen. Een man reed op un rustig weggie en daor was bienao gien verkeer. Hij reed kalmpies an en zag veurum iemand ant hardloopn midden op de weg. ‘Nou die is goed bezig met zien lief’ dacht de autobestuurder. Toene angaf dette wol inhaaln, gaf de hardloper met zien arm an det de auto mar kalm an mos doen. Toen dacht de autobestuurder det zoiets nens op sleut, hij kon toch niet stapvoets gaon riedn umdet de hardloper de weg neudig had umme hard te loopn. De autobestuurder had uut beleefdheid anne geem dette wol inhaaln.  As de hardloper dan gien ruimte gef um in te haaln kuj um toch ok niet veur de baste jaagn aim half deur de berm in gaot haaln? Ie kon dur ok naost gaon riedn en um zegn dei oen weegbelasting betaald hebt en dus gebruuk mag maakn vol de hele weg.

De hardloper mut zich ok an de wegregels haoln en dur stiet nens dei midden op weg maagt loopn en det andern zich an oe mun anpassen. Assie echter graag onder un auto wult kom en de schade daorvan wurd vergoed, ister over te praotn.

Ton