LEMELERVELD – Ai bieste hebt hei de taak um dur ok veur te zurgen. Ai det niet goed doet kriej allelei luu achter oen konte an die oe zult verteln wai mun doen um hun tevreden te steln. Asse oen bieste in de modder of de mest wult laotn rondbanjern  is det veur die bieste minder leuk. Ie kunt wel zegn det de bieste niet anders ewent bint en assie ut iniens heel anders gaot doen kriegt de bieste ontwenningstrammelant.

Det levert dan weer stress op bie de bieste waorbie ze dan slechter gaot etten en dan kriej det gedoe weer. Assie noe in koppel kippen hebt hoefie allenig mar te zurgen det ze genog voer en water hebt. Ai ze dan ok  nog in un hokkie met in renne hebt kunt die kipn zich best vermaakn. Ie komt um de tied ut voer bievuln en metiene de eier uuthaaln. Assie dan deur un hekkie van de renne mut en det hekkie hef un rotsluuting kuj mangs hellig wurn. Ie loopt daor met un zak kippenvoer op oen  erm en wul dan det pokke hekkie lus doen. En dan giet ut  kats mis. De zak kippenboer sodermeitert op de grond net assie ut hekkie lus hebt.

An de iene kante bei blij dei ut hekkie lus hebt ekreegn, mar an de andere kante kuj begin te vleukn det de zak kippenvoer an barrels op de grond ligt. Mar vleukn helpt niet, dus muj mar teegn oen kipn te keer gaon, as die allemaol massaal op ut voer kompt anvliegn alsof ze a un hele tied niks meer ehad hebt. Ut voer ligt biet hekkie en umdet det nog lus stiet denkt die kipn ok um eem buutn de renne te gon kiekn. Schupn mag niet dus ie vraogt de kipn um netties terugge te gaon.  Asse dan niet direkt wult luustern kuj oe de haore wel uut de kop trekn en muj noe as un idioot rondren um ut zooitje weer in de renne te kriegn. Die kipn weet niet wat hun overkump, zo iniens un hele grote vremde renne. Eerst vleugn ze op die bult voer aof en noe is ut buutn de renne veul mooier. Gelukkig kumpter iemand helpn bie ut binjaagn van de kipn en kuj noe saam ut geslaterde voer opruum. De kipn bint eem op onderzuuk ewes buutn de renne en ut voer zit noe weer in de veuraodbak.