DALSEN – Joa mensen, het is al weer meert en det betekend Dialect moand!! Heerlijk!! Ik bin Hendrik van de Steege en ik hoape det jullie weer net zo völle plezier an de dialect moand goat beleav’n as ikke. En as ie noe denkt van goh, ik zol ok wel es in het dialect willen schriem’n. Gewoon doen!

Hoe meer aandacht veur her Nedersaksisch, hoe better. En zekers as het in het dialect is woar as ie oe het beste in kunt uutdrukk’n. Zo schrief ik dus ok af en toe stukkies oaver wat ik zoal beleave hier en doar.

Mar ie magt natuurlijk ok een mooi gedichie schriem of een verhaaltie van een paar regels. Ik weet zeker det Willy van Dalfsennet het wel graag veur oe wil plaatsen en anders zeg ie hem mar, det ik de ezegd hebbe.

Zo hebt wi-j onlangs een ni-je keuk’n in huus e-kregen, een mancave veur mien vrouwe zeg mar.

Wi-j hebt der een paar ovens in um mooi cakes in te kunn’n bakken en het vleis kump der deur en deur mals ut. Ok de eerdappel bint geweldig en wi’j hebt de friteuurpanne niet meer neudig noe.

De olde oven was nog hillemoale niet zo old en die heb ik op Marktplaats ezet. Ik had geliek beet: een vrouwe mail’n mie al binnen een dag of die oven der nog was en of het toevallig een zelfreinigende oven is. Ik zeg ja det klopt: aj um smerig maakt, mu-j um altied ZELF reinigen. Nou, de koop was dus al gauw gesloot’n en mevrouw ging op huus an met de oven.

In oonze ni-je keuk’n hebt wi-j noe ok völle meer keukenkassies. Alderbastends handig:

Keukenkassie, keukenkassie, de borden stoat noe mooi uut het zicht

bi-j de iene bint ze donker, bi-j een aander  bint ze licht

Keukenkassie, keukenkassie,  wat kun ie der toch völle in kwiet

Het opruum’n giet veul sneller en kost oons minder tied

Keukenkassie, keukenkassie, alles achter de deurties, niemand die ut stoort

Met een ni-je keuk’n, heb ie punten bi-j oe vrouwe e-scoort

Keukenkassie, keukenkassie, scharnier’n met een auto stop

En as ie um verget dichte te doen, stoot ie mangs lillek oe kop

Mensen gegroet en tut gauw!

Hendrik van de Steege