LEMELERVELD – Met overdag mooi weer, mar ’s nachts nog vorst ist wel un bettie vrog um noe a gazon te gon meien. Mar un vrouwe wolt toch graag edaone hem, dus pak ik de electrische grusmeier uut de schuure met ut velengsnoer durbie. Met ut nor buutnrien met de meier sodermietert dur un wielegie oaf. De vrouwe gelieke in paniek, want hoe konk noe nog meien?

Ik gung eem kieken weurumme det wielegie dur oaf kon valn. Ut bleek det ut borgringetie milndeur was ubreukn. Noe konk probeern um in plaaste van det borgringetie un dreugie umme de asse te dreien. Ut wielegie bleef noe op zien plaatste en konk gon meien. De vrouwe was blij met mien oplossing. Toen eem later ut wielegie dur weer oaf gunk, zei de vrouwe det ze un buurman zol beln of die met zien meimachine wol kom. Ze had iniens niet meer zo’n vertrouwn in mien geknooi. En misschien had ze daor ok geliek an, marja ast assie kats glad is blef ut dreugie meuluk hang. Ik had al geprobeert um te meien met drie wielen en det wol eigenluk best wel.  Dit zol un grote bezuuneging kun ween biet maakn van grusmeiers, want weurum vier wieln ast met drie ok wul. De buurman die al met zien meier deran kwaamp mog weer op huus an, want ik konne mie durmee redn. ‘Ok ai gehandicapt wat mun doen, muijt gewoon probeern’ zol de grusmeier met drie wielegies wel denkn.

Ton

.