LEMELERVELD – Un tietie lene hak un kettenzaage lient van iemand. Toenkum gebruukt had en de boel weer wol inpakn, wurn mien aandacht offe leidt deur un bekvechterije. Deurum waak de beschermhoes van de ketten kats vergeetn met te nem. Ik beln die luu op of det diggie dur nog lag. En inderdaad ze haan de hoes nog niet op marktplaats ezet met ut idee: gevonden goed kuj mooi verpatsen.

Ikke dur weer hen um die beschermhoes weer op te haaln. Ik kon muuluk de kettenzaage weer teruggebrengn nor de eigenaar van de zaage zonder beschermhoes.

Dan zol die kerl zegn dek nooit meer iets van hem mog lien. Det mog mie niet gebeurn, dek zo un slechte name gung opbouwn. Tenslotte muj bie oezelf naogaon: as iemand un schuppe van mie lient en ik kriege de schuppe weer terugge met un kapotte steele, dan zol ik daor niet blij mee ween. Zo ist ok ai veur iemand ant werk bint. Ai zelf niet al te scherp bint mar un bettie soepel, kuj verwachten det ze oe ok soepel behandeld. Tis ait nog zo: veur wat heurt wat.

Ton