LEMELERVELD – Un kerl hef un lappe gruuntetuun en die konne ait volpotn met van allerlei gruunte. De man is al older en is dan ok aorig stiever in de botten. Bukken giet met veul meuite en deurumme hebt zien kinder un grote bak emaakt waore noe un gruuntetuun op heugte hef. Pa hoeft niet meer te bukken asse met zien gruunte ant knooien giet.

Die kerl vreug mie okkum  eem wol helpen um de smerige kwekken dur uut te haaln.  Gruunte potten met un bult kwekken in de grond, daor had die kerl un gloepense hekel an. Asse gruunte giet poten en hij kwam steeds kwekken teegn, dan hoeft ut van hem niet meer. Ik zei nog dette mooi de tied veur kon nem biet poten van zien gruunte en dan gelieke de kwekken dur uut haaln. As de kerl wat bie zich had um mie ut nor de kop te gooin, dan hadde det zeker edaone. In de bak stond miln in eerdbrien van veurig jaor en an weerskanten stondur gruuntepruttel die allemaol weg mog. Dan mos ik metiene de kwekken dur zoveul mogeluk uuthaaln. ‘Tjonge det wurd nog un heel gedoe’ dacht ik, want aster ok mar un klein spiertie kweek blef zitn gruut det zo weer verdan. Ik ben mar begun um un meter diepe te spitten en alles op un bult te gooien. Die bult in leugies terugge int gat gooien en dan goed kiekn ok kwekken zaage. Zoveul mogeluk de kwekken duruut vissen en zo probeern de grond schone te kriegn.

Alle grond was deure spit en boomop kwam un laoge mest die dur deur eknooit is. Noe kon de nieuwe eerdbeien derin en watter nog an ruumte over is kanne later gebruukt wurn veur andere gruunte. Noe mar hoppen dew de kwekken de baas blieft.

Ton S.