LEMELERVELD – As mensen ait ewent bint um zelf in de tuun te knooien, dut ut zeer ai det niet meer kunt. Biet older wurn kunter mangs dingn an oen lief gebeurn, waordeur ie better ut geknooi in de tuun achterwege kunt laotn.  Ie kunt wel eignwies ween en as oen hande gaot jeukn um wat in de tuun te gaon doen, kuj daor later spiet van kriegn ai det gaot doen.

Ai un hulpe hebt kun regeln, denkie vake dei wel un bettie kunt meehelpen, mar det is vake niet verstandig.  An de daagn daornao kuj ant lief  vuuln, dei toch te veule edaone hebt. Tis wel eem wen um allenig mar toe te kiekn hoe de hulpe in oen tuun ant knooin giet. De hulpe is nog lange niet zo old assie bint en hef ok niet zoveul kennis en ervaring as oezelf. Deurum kuj toch wel helpn met advies geem, mar tis wel de vraoge of oen hulpe daor op zit te wachten. Ai oe dur steeds mee gaot bemuujn, kan de hulpe gaon denken dei ut dan toch mar zelf mun doen assie ut ait better wult weetn.  De hulpe mut wel begriepn det ut oen tuun is en assie oe dur mee bemuujt is der niet zo raar. Mar de hulpe mut wel ut idee hem dei vertrouwn in hem hebt watte ant doen is. Ie zoln kun verteln hoe ie ut ait deun en daor kanne misschien ok nog wat van leern. As de hulpe ut minder prettig vindt dei steeds op zien hande zit te loern muj det wel kun begriepn. Tis natuutluk wel zo det ieder ut op zien of heur eign manier dut en um daor dan over te gon bekn met menare hef ok gien zin. Ut mooiste is um ut saam te doen, dan hei dur beide plezier an.