LEMELERVELD – Ie heurt nie en dan over luu die un mancave hebt. Det is dan un ruumte, waor kerls kunt uutvretn wat ze graag wult doen. De iene giet met un stel vrienden ant zoepn of gamen, de ander giet veur de televisie hang of iets kats aans.  Asse mar ut idee hef dette niet an de kop ezeurt wurd en kan doen watte graag wul.

Un kerl hef twee zeuns en de oldste vreug zien va of de logeerkamer niet ummebouwt mog wurn tut un mancave veur hem. De logeerkamer wurn noe a bienao niet gebruukt en hij wol niet ieder aomt bij zien olders op de banke bliem hang. Hij mos dan nor de televisieprogramma’s van hun keuze kiekn en asse dan un eign televiesie had konne kiekn watte zelf wol. Saam met zien breurtie zol det wel mooier ween. Ok asse mangs vriendn op bezuuk had kon ze daor bie menare ween. Want as de olde luu dur bie zit wutter aans epraot dan onder menare. De vrienden praot dan meer vrijuut. De logeerkamer wurn noe aans inne richt met un televisie , un banke met un taofel en un paar luie stoeln. Ie zoln kun zegn dette op zien eign slaopkamer ok kon rondhangn mar um dan met zien allen op berre te gaon zitn is ok niet je van het. As de leste tied ok deur corona dur niet zo vake meer vrienden langskomt dacht de va det hij ok gebruuk kon maakn van de mancave. Asse dan graag tied wul nem um te doen wat hij wul, kanne det noe mooi doen umdet de ruumte dur noe is.

Ton