LEMELERVELD  – Kippen zit altied int hok en kunt ok nor buuten loopn. Asse dan eier gaot legn doet ze det netties int hokke. Dur is un ruum hok en daorveur stiet un kleiner hukkie met un eign rennegie. Ut eier legn deun ze ait int grote hok, wamt daor lag ok stro en det veult better an de legbatereie. Noe haolt de kipn van variatie, want um ait op dezelfde plaaste de eier te gaon legn det giet  un keer verveeln.

Deurum wurn dur ok int kleiner hukkie eier neer elegt. Mar daor lag gien stro in en dus kreeg de kippenboer  un hint van zien kippen. Asse de eier kwaamp uuthaaln zaten de eier vol met stront. Dan mosse de eier eerst schonewassen, want asse de eier zo an zien vrouwe zol geem konne un grote bek kriegn. De kippen dachten a zoiets en met die smerige eier gaam ze an det ze un schoner hok wol hem en un verse laoge stro. De boer mos noe ant werk um de stront en ut smerige stro weg te haaln en ut dan te verversen. De kippen zoln dan met meer plezier met de legbatereie an de gank gaon. Toen de boer zo bezig was konne gelieke de spinnewebben en de andere prut wegruum. De kippen zoln noe van de leg kun raakn deur de verbazing van ut opgeruumde schone hok. Aster noe dan toch weer eier wurd elegt zol de boer zien vrouwe tevrene haoln met schone eier.

Ton