LEMELERVELD – Un oldere vrouwe hef op un camping ant water un staocaravan staon. Heur man is viefentwintig jaor elene twee jaor meewes nor die camping en is heur toen ontvaln. Sinds die tied giet ze vake allenig nor die camping en pas gunk zie dur weer opan. Zie had thuus spuln die dur nor toe mossen, dus de auto annetrapt en nor de staocaravan hen.

Zie was daor eem ant knooien en stootn per ongeluk teegn un kraane en kreeg iniens lekkage. Ai dan rap de hoofdkraan dichte doet kuj op gemak ut probleem oplussen. Mar zie had zoiets nog niet eerder mee emaakt en wus ok kats nie waor die hoofdkraane zat. Noe waorn dur nog niet veule mensen op de camping waor zie hulpe kon gaon vraogn. “Tja”dacht zie toen, “dan muk mar ens aans hulpe zien te kriegn aans wurd un mooie smeerboel in de staocaravan”. Zie met de auto ut durp in um un loodgieter te zuukn. Gelukkig veur heur zag zie un auto van un instalatiebedrijf op de hoek van un straote en zie gunk gelieke vraogn of de monteur heur eempies kon voorthelpn. De monteur wol wel eempies met heur meerieden nor de staocaravan waore de lekkage rap estopt hef. De vrouwe was kats tevrene det zie ut toch weer allenig hadde efikst. Zie hef wel un paar kinder, mar die hebt nooit gin tied um ait mar achter ma an te loopn as die weer iets hef te zeurn.

De vrouwe wul ok absoluut niet steeds hun hulpe vraogn aster iets is waor ze allenig niet meer uutkump. Zie heft ait allenig edaone en det zal wel zo bliemn.

Ton