LEMELERVELD – Met dit gruuizame weer wul ut gazon wel hard gruuien. Met un gazonmeier kuj oe dan merakel goed redn. Dur bint duwmeiers, motormeiers of electrische meiers. Ait helemaol makkeluk wult hem binter ok robotmeiers. Dan wurter un draogie umme ut gazon emaakt en daor bin kan de robomeier ant meien.

As die meiers goed wurd onderhaoln kuj dan an de gank. Bie det onderhaoln heurt mangs ok ut sliepn van de messen. As det mut gebeurn kuj dan zien an hoe ut apparaat ant meien is. As de messen dan esleepn mut wurn kan un monteur oen robomeier metnem. Ut gazon mut dan toch un keer emeit wurn aans kuj dur a bienao heui van maakn. Veurdet de robomeier teruggebracht wurn duurn a bienao un weeke. Toene offelevert wurn was de tuineigenaar daor niet van op de hoogte. Toene iniens de robomeier op ut gazon zag staon vonne det raar, want ast goed dut isse ant rondrieden en meit dan gelieke ut gazon. Hij nor buutn en mos goed zuukn waor as de robomeier noe stond.

Ut gazon was in die weeke hard deur egruuit dette met muuite de robomeier nog kon zien staon. Eindeluk heffum toch efun en kon opt schermpie van de robomeier zien det de messen waarn vaste loopn. Noe eerst ut gazon mar weer meien met de motormeier en dan mar zien um de robomeier weer an de gank te kriegn. Um det te probeern mos de robomeier eem op de kop elegt wurn, zodei ut grus bie de messen  kon weghaaln en de boel schone te maakn. Toen de robomeier weer rechtop ezet wurn deut ut apparaat ut weer. Noe kant ut apparaat ut gazon weer goed biehaoln.

Ton