LEMELERVELD – Iemand had in zien vakantiehuusie verstopping bie de aofvoer. Hij zat wel op ut riool anneslutten, mar ai in huus trammelant kriegt ast water niet goed weg wul loopn muj dur toch wat an doen. Veurdet de hulpe kwaamp die daor mee bezigwol, dach de eigenaar um avaste de afvoerpiepe bloot te legn dan kon de hulpe gelieke an de gank.
De tekening van hoe ut piepengedoe allemaol leup, die waarn a lange kwiet en noe mos de afvoerpiepe mar oppezug wurn volgens de anwiezing van de olde eigenaar. Hij hatter un hulpe bie evraogt um veur hem te gon spitten waor volgens hem de afvoerpiepe mos lign. Dur zat un kraantie buutn en daor mos dan de afvoer begin, want bin zat daor ok un kraane. En inderdaad zat daor un afvoerpiepe in de grond naost un stroomkabel. Volgens de eigenaar leup dan de afvoer naost de straote int gazon tut de hoek van de straote en dan beug de afvoerpiepe aof en gung dan an de zietkante verdan. De hulpe was ant spitn en zag det de aofvoer met un haokse bochte in de border uutkwaamp en niet int gazon. In die border mossen enkele planten duruut en ok ut antiworteldoek mos kapot esnene wurn um un gat te kun graamn tutdei de afvoerpiepe efun haan. Op de hoek van de straote wast noe de vraoge of de afvoerpiepe verder onder de straote lag of noe wel int gazon, want de straote lag noe teegn ut huusie an.
Eem kiekn of de piepe onder de straote deur leup nor ut gazon en inderdaod lagter un dikke piepe mar die beug niet aof mar leup in in soort zinkputte. Eerst mar kiekn hoe groot die putte was en ofter nog un andere piepe inzat. De eigenaar stond kats verbaasd, want volgens hem mos die afvoerpiepe int gazon lign. Die putte daor wusse niks van. De hulpe biet spitn vreug offe ut gazon nog meer op de kop mos zetn dan funne misschien nog iets onbekends. Bie un vensterraam mos de aofvoerpiepe nor bin loopn en dus daor ok mar op zuuk nor de aofvoerpiepe, mar niet efun. Met al die gaatn int gazon zoj haost denken detter un koppel moln an de gank ewes is. De verwachte hulpe veur de afvoer zal noe zelf mun zuukn hoe aof de piepe ens lup.
Ton