LEMELERVELD – In de schuure hei un zitmeier staon. In de winter heffe daor un tied stille staone. Noe ut grus weer umeit kan wurn, wuj  de zitmeier weer gebruukn. Mar de accu is noe kats leug eloopn. Dus anstarten wul niet meer. Overstarten vanaof un auto mut wuln, mar de schuure stiet op un plaatse waor ie met de auto niet kunt kom en um de zitmeier helemaol nor veurn te drukken daor  goj niet an begin.

Ie wult oezelf ok niet de ellende inrepln. Stel oe veur dei de zitmeier mut heul veul meuite verplaatst hebt en ie heb dan iniens rugprobleemn dan bej nog verder van huus. Dan krieg ie de zitmeier misschien wel weer ant loopn, mar ie kunter zelf niet meer op zitn deur oen rugprobleemn. Dus det drukn loj mooi ween en ie belt un monteur op die dan mar mut komn. De monteur hef zo”n starthulp bie zich en dan lup de zutmeier a rap. Toch wul de monteur de zitmeier metnemn nor de zake um de boel eem nao te kieken, want asse noe weer uutgiet en hij mut weerkomn um weer te starten wurt wel un bettie duur. De monteur hef op oen oprit un auto staon, waor de zitmeier dan opmut.  De monteur jag nor veurn en asse bie zien auto kump met de zitmeier heffe ok nog un lekke band ande zitmeier. De eigenaar van de zitmeier waster van overtuugt det de band in de schuure nog heel was. Hoe de band noe lek ewurn is det laot wie verder int midden, mar as de nota betaald mut wurn zal det toch weer benuumt wurn. De eigenaar hef un foto maakt van de stiene waor de monteur overhen ekachelt is en de band lek ejag hef. Ze zult wel iens wurn, denk ik. Noe muj dur mar van uut gaon det de zitmeier goed emaakt wurd en ai um weer terugge hebt kuj weer ant meien.

Ton S