LEMELERVELD – Un stien oprit die hef ut naodeel detter allemaol onkruud kan gaon gruujn in de voegen van die stienen. Dan muj dur wat op verzin umdet druut te kriegn. Assie noe beton estort haan, dan hai ok gien voegen waor det onkruud kon gaon gruujn. Mar ie hebt det niet, dus kiek: ut onkruud kump gezellig   terugge en ie kunter mee gangs um ut weg te kriegn.

Met un spieker, schroemdeier, mes of voegenkrabber, ut mak niet uut wai nemt, aster mar uut giet. Vake muj dan ok nog op de kniene, ja niet um te bidden det mar rap gebeurt mag ween. Mar ie kunt ok op un krukkie gaon zitn zodei dicht bie de grond bint um ut onkruud druut te krabben. Noe binter ok allerlei gereedschappen daor veur te koop. Un schoffel,  staolburstel an un stok, onkruudbrander, of onkruudkrabber an un stok en gao zo nog mar eem deur. Ie kunt ut beste det nem waor ie un goed gevuul bie hebt. Spuiten met azien of andere rommel kan ok helpn, mar het milieu is daor mangs niet blij mee. Assie ut wel bint, muj mar bekiekn wai doet. Noewt over het milieu hebt, wutter noe veule praot over minder hardigheid in de tuun en meer gruun. Det is veural um  de wateroverlast te veurkomn. Met meer gruun in de tuun kant water goed weg. Ai dur dan veur kiest um minder stien of andere prut in de tuun te nem, hoefie ok gien oprit meer onkruudvrij te maakn en hebbie die krabpruttel ok niet neudig. Last van de rugge deur ut kromstaon of zere kniene  vant rondkroepn um ut onkruud weg te knooin kriej dan ok niet meer. Gruun gras stiet ait nog better as un gruune aanslag op de stienen oprit.

Ton S.