LEMELERVELD – Assie mangs buschauffeur bint, kant gebeurn dei gaot sopn en de boel ondersmeert. Dur zit mangs wachttied tussen oen ritten. Ie kunt dan uut de neuse gaon vretn, mar die is ok un keer leug. Klooin op oen telefoon is noe erg populair. Ie kunt ok un kraante van huus metnem en un kuppie koffie daorbie is zo gek nog niet.

Assie dan ooit un thermoskanne ekreegn hebt is die wel handig daorveur. As die thermoskanne goed aofslut hei gin last det de koffie dur uut giet plumpen. Ie gaoter van uut det de kanne gied dichte is en stopt oen kraante met de kanne in oen fietstasse. Noe kuj gaon denkn dei dur dan niks an hebt assie ut neudig hebt in de busse. Mar maak oe mar niet naar, ie gaot met die fietstasse an de fietse nor de beginhalte van de busse. Umdei niet met de hande vol wult fietsen hei de fietstasse daorveur neudig. Ie komt dan bie de busse an en wult a gaon vluukn, want ie ziet det de thermoskanne toch niet goed dichte zat en de kraante is ok nog nat ewurn.  Dus noe ut probleemn hoe haol ik de kanne, met de koffie die dur nog in zit, in de busse zoveul mogeluk rechtop zodet ut niet meer giet sopn. Ie denkt um de kanne in het daschboard te legn en de kraante dur naost. Zo kan de kanne niet meer gon schoemn.  Ie komter later achter det de kraante niet genog was um ut verschoemn van de kanne te veurkomn. Noe ziej detter nog meer onder esmeert is deur de koffie. Gelukkig hei un lappe fun in de deure van de busse en daormee kuj gon schone maakn. Die lappe is dreuge en un bettie water derbie zol wel handig ween. Ie kiekt onderweg waorie de lappe kunt nat maakn en ie ziet vievers , slootn en met dit weer un bonke tuunsproeiers volop ant spuitn.  Toch goj nor un tankstation waorie in de plee de lappe kunt uut spuuln en goed natmaakn. Noe kuj goed ant schonevriemn, want ie wult niet de name kriegn van gasterd umdettie alles met koffie hebt onder esmeert.

Ton