LEMELERVELD –  Un oldere vrouw hef un huussie op un camping kurt biet water. Heur kinder komt mangs bie heur op bezeuk asse tied hebt en det gebeurt niet vake. Dus ut mense kumpter vake allenig. De vaste bezeukers van de camping kent heur goed umdet ze a jaorn daor kump. Zie hef zelf ok met un zeilboot evaarn. Det was un grote hobby van heur. Die zeilboot stiet noe bie heur huus in de schuure op un anhanger. Bie heur huussie op de camping hef ze noe un motorbeutie.

Un paar keer per jaor giet ze daor nog mee ut water op. Mar um allenig al de bedekking van de boot helemaal lus te haaln, vind ze un probleem. Umdet ze zelf niet zo soepel meer is en ze bienoa nooit hulpe vrug, hef ze noe dan toch iemand evraogt um de bende bie ut huussie op te ruum. En toen ze daor waarn vreug de hulpe of ze niet met de boot op pad wol met det mooie weer. En inderdaad noe ze hulpe had kont gebeurn. Toen ze dan ok miln opt water waan zei ze det dit veur heur echt vakantie was.  De hulpe dacht wat un kleinigheid goed kan anvuuln.

De hulpe die ok bie in de boot zat had kats goen kennis of ervaring met vaarn met bootn. Toen ze bienaobterugg waarn vreug de vrouwe of de hulpe eem ut stootkussen buutnboord wol hang. De hulpe zag zo’n kussen lign en gooin ut int water. De kuujn had helemaol niet ekeekn ofter wel un touw an zat. Dus alle andere bootn die ze teegn kwaam reupn a rap det ze ut stootkussen int water haan lign. Dus mossen ze weer terugge um det kussen op te haaln. De hulpe zei toen det ze zo toch langer opt water waan.

Ton