LEMELERVELD – Assie iets an menare wult plakn, kuj det op allerlei maniern doen. Plakband is daor heel goed veur. Noe hei plakband in allerlei soorten en kleurn en ut wurd mangs ok tape eneumt. Tape kuj mangs ok zo aofscheurn en dan hei ok gien scheere of mes neudig. Assie noe van det gewone transparante plakband hebt, kuj mangs met meuite ut begin vin.

Ie ziet nens waor ut begin zit. Ja ik nuume det ut begin, mar eigenluk ist ut ende van de plakband op ut rullegie. Ut begin zit helemaol midden int rullegie zelf. Assie noe un stukkie plakband wult hem, muj zien waor of ut leste stukkie offe haalt is.

Umdet ut transparant is kuj niet zien waor ie wat kunt aofhaaln. Ie probeert met oen vinger um te vuuln waor ut leste stukkie is aoffe haalt. Ai aorig eelt op oen jatten hebt zal det niet meevaln.

Dan muj met un messie of un scheertie langs ut rullegie gaon um uut te vin waor ut leste stukkie is aoffe haalt. As de leste gebruuker ut leste stukkie un entie ummevooln hef haj a rap kun zien waorie un stukkie plakband kunt aofhaaln. Mar ie zult ut altied  zien det assie met andern saamwerkt det ieder ut op zien eign maniere dut en ut niet zo makkeluk wult doen. Ie hebt dus allenig mar met un rullegie plakband te maakn waor ut begin of ut ende mar mut zien te vin um daor un stukkie aof te haaln.. Mar noe ik ut toch heb over knipn en plakn hebbe, dur bint noe van die verpakking waor ie zonder scheere of mes helemaol niks mee kunt um die lus te kriegn. Anders koj met de tanden die k….verpakking nog wel luskriegn mar det wul mangs helemaol niet meer.  Tis vake machinaal inne pakt. Nens kuj un lippie vin of un inkeping wat wul helpn , dus muj toch un scheere opzuukn.  Ie mun zelfs oppassen dei ut diggie det innepakt is, biet uitpakken heel blef. Aans goj helemaol baaln, umdet ut diggie waor ut umme giet, ut uutpakn niet hef overleeft. Dan muj weer un nieuwn kopen en komme weer zo’n inpakgeval teegn.  En dan mar better uutkiekn met uutpakn.

Ton