LEMELERVELD – Un kippnboer had un paar schuurn vol met kipn. In iene schuure zaatn kuukens. Ie weet wel van det kleine spul. Op un gegeem moment waarn de kuukens old genog det ze nor un andere schuure mossen. Daor krieg ze dan ander voer en hebt ze ok meer ruumte. Det mut allemaol veur de vergunning.

Boern mut zich mangs in allerlei bochten dreien um verder te moogn. Um noe die kuukens te verhuusn zol un bonke tied kosten. Ja ut binter nogal un bonke, ietsie meer as un stuk of tiene. Un stuk  of tiene kuj zelf nog wel vang en dan rap verhuusn. Noe bint ut un paar duuzend en daor bei wel eempies druk mee. Ok bie de boern is meer tied dus ok meer geld det giet kosten.  De boer gunk ant piekern hoe oft ut aans kon. Hij leup op zijn boerderije rond en zag un olde heuiblaozer staon en kreeg un idee. Met die heuibaozer konne de kuukens zo van de ene schuure nor de andere schuure blaozn. Met piepn an de uutlaot konne die zo nor de andere schuure laotn loopn en dan konne veule rapper de kuukens verplaatsen. De kuukens kunt ait wel ietsie vliegn en dan kwaam ze ok niet keihard op grond trechte. Ut lek nogal diermishandeling , mar bedenk is assiet anders doet en det duurt machtig lange dan kriegt die kuukens te maakn met un bonke stress. Det hef dan weer as gevolg un groeistoornis. Ast rap giet ist veur ut kuukn en de boer better.

Un andere boer wol zien knoln op gaon haaln. Die knoln laagn al op riggelties opt land. Hij kon met un greepe de knoln op un laadbakkie gooin. Hij zat eem te prakizeern oft ok aans kon en dan ok nog rapper.  Hij bedacht toen dette nog un olde opraapwaagn had staon. Die konne mooi gebuukn um de knoln opte haaln. Asse niet al te hard gunk rien mos det toch kun.

Dus ant probeer en ut gunk best wel goed. Ie mossen allenig mangs wel vaker deroverhen asse niet alles had mee enum. Mar ut gunk toch rapper as met de greepe.