LEMELERVELD – Wiele gung nor un verjaordagsfeessie. Twas nog mooi weer, dus kon wiele buutn in de tuun zitn. Dur ston a stoeln en taofels onder partytenten klaor en det gunk mooi. Det wurn aans toent begon te reegn en zelfs onweern. Veur sommigen wurn ut bliem zitn noe minder leuk, want die bleem niet meer dreuge. Dur wurn rap un stuk zeil bie eslept en an de rand van de partytente knupt.

Zo kon die luu die daor un natte rugge kreegn weer dreuge zitn. Op un gegeem moment wast weer dreuge en ien van de gasten begon a te kaagn det ut zeil noe ut lekker deurweien niet meer meugeluk had emaakt. Mar de andern snoern hem a rap de mond en zeien det ut zo weer pokkeweer zol wurn dus ut zeil bleef mooi hang. As de klager ut te werm kreeg mosse mar buutn de tente gon zitn. En inderdaod later begont weer te reegn en ok nog hard te weien. De partytente wol vortweien en mos vastehaoln wurn. Dur was nog un overkapping in de buurte waorie onder kon gon staon um dreuge te bliem. Ientie van de gasten had un reegnpak annedaone en kon zo andern helpn um de partytenten in te klapn veurdet ut hele spul zol vortvliegn. Zo haan wiele un feessie waorie van bin en van buutn nat kon wurn.

Ton