LEMELERVELD – Dur waarn wat lui in un fitnessruumte  bezig um te oefenen of sporten. Hoeit ok wult nuum. Iniens kumpter un katte binloopn, want iemand had de buutendeure los laoten staon. Toen de katte det zag, dacht denne: oh daor kank ok wellis eem gaon kiekn, wat daor te doen is.

Misschien binter wat moezen ant trainen um zo hard mogeluk te leern weg te loopn asse mie ziet. Toen de sporters de katte zaag loopn, gung ze eerst met menare ant bekvechten wie die katte mos gaon vang um die dan weer nor buutn te doen.  Terwijl ze nog ant bekvechten waarn had de katte ut al bekeken detter bie die sporters gin bal te doen was en gunk de katte zelf weer nor buutn.

Un ander geval giet over un klein huntie.  Det biessie kwam as vondeling uut ut buutenland waore oorlogslawaai ewent was. Toch wus ut huntie niet waore bliem mos toene onweerslawaai heurn en wol gauw onder de kaste kroepn. De ruumte um deur te kroepn was bielange niet groot genog veurum.  Ut huntie vreug zuch dan ok aof hoe iemand un kaste in huus hef waorie met gezond verstand niet iens onder kunt kroepn. Noe ut huntie zich nens kon verstoppen veurt lawaai mosse mar wat aans verzin.

Ut huntie had zien plekkie op de banke en aster iemand naost zien deken gunk zitn, kreupe gelieke bie die iemand op schoot. De eigenaresse van huntie zag det de persoon die naost ut huntie was gon zitn, ut gelebber vant huntie niet kon waardeern dus ze reup ut huntie steeds weg. Mar ut huntie was toe an un gehoorapparaat of verstond gien nederlands umdette uut ut buutnland kwaamp. Noe waster gien tolk mar ut huntulie wol toch bie heur komn.  Det zal wel kom umdet ut huntie wus det bie heur ut a gauw goed is en ok umdette bie heur ait wat te vretten is.  Zo kan det huntie rap un andere taal leern.