LEMELERVELD – Un oldere vrouwe woont in un vakantiehuussie. Daor mag ze noe permanent woon en det nuumt ze dan gedoogd. Assie dur weer uut giet vervalt det gedoogdgedoe en maggie dur allenig un bepaalde tied inwoon.  De andere tied muj mar ens aans in kroepn.

Bie det huussie lig un beste lappe tuun en daor kuj mooi de tied kwiet met ut knooien tussen de planten en zo. De vrouwe hef det ait met veul plezier edaone, mar de leste tied wul det minder goed. Ut zol de leeftied wel ween, want grus meien met de rollator gunk niet meer zo rap. Ze hef noe hulpe neudig en gelukkig hef ze die ok nog evun. Zie ister merakel blij mee as ut grus netties emeit wurd terwijl zie zelf in un stoel kan genietn det ut allemaol daone wurd. Noe was de hulpe weer ant meien terwijl zie zelf un bonke bezuuk kreeg. Ut bezuuk zat mooi te teuten en zag hoe de hulpe ant grusmeien was. Ja bekeekn wurn is gien probleem, mar ut bezuuk gunk zich te bemuuen met ut werk wat de hulpe deed en volgens hun mos doen. De hulpe wus niet wat hem overkwaamp.  Hij zei dur eerst niet wat van, mar toen ze bleem deurneuln, zeie det as hun ut better wusn dan moggen ze ut zelf verder doen. Het bleefter  niet bie um dur van te zegn, de hulpe leut alles staon en wus niet hoe hard hij nor zien auto mos sjouwn en weg te scheurn.  Ut bezuuk zol misschien vreemd oppe keekn hem en noe mossen ze zelf ant grusmeien. Of ze det edaone hebt kon de hulpe ok gien zak scheeln. Hij zol de vrouwe later  wel eem beln of ze det nog edaone hebt. Hij dacht det de vrouwe zelf ok niet wus watter noe gebeurd was det heur bezuukn iniens begon te neuln over ut grusmeien. Zie zol heus wel begriepn watter hebeurd was toen de hulpe niet zat te wachten op ut geneul van heur bezuuk.