LEMELERVELD – Un kerl wol meedoen an un biertapwedstrijd. Daor deunder veule an met. Sommigen zult wel meedoen veur ut gratis bier det ze dan kriegt. Dan wurter un bonke bier etapt um te oefenen en det mut ze ok kwiet, want ie kunt ok niet alles weggooin. Aster un biertie tap t wurd, wuj un mooi laogie schoem en niet un glas met bienao allenig mar schoem.

De preizen vant bier bint noe zo, dei un glas met un bulte schoem de mensen niet meer kunt veurzetn. De baas van de tente wul det ok niet, want dan gaot de klanten vort.

Bie ut wedstrijdtappen mossie un goed glas bier tapn met un goeie schoemkraage en dan mossie met det glas op un dienblad nor un jurytaofel loopn. De kerl die noe metdeut an die tapwedstrijd had un goed glas bier etapt en dacht misschien dette a meedeut veur de finale. Hij zette ut glas op ut blad en wol ut op ien hand metnem. Helaas sotermeitern ut glas umme en zagge zien kansen int water ( of eigenluk bier)  valn. Hij kreeg gauw un deur ander getapt glas annegeem en kon ut leupie nor de jury nog aofmaakn.  Toen de hele groep deelnemmers ewes was kon de jury dur niet uutkom en moster un tweede ronde deune wurn.

Daornao gunk de jury weer in overleg en kwaamp met de mededeling det ze nao de pauze zoln laotn weetn hoet noe verder gunk. Nao de pauze leutn ze weetn detter vief mensen anneweezn waarn veur de finale. De kerl die zien glasqa had laotn ummesotermietern had noe bekeekn en gunk op huus an. Hij moster de volgende murn dur weer vrog uut. Hij had noe eleert dei biertappen vaker mun doen um ut glas met genog bier durin op de goeie plaaste te kriegn.

Ton S.