LEMELERVELD – Un hok vol kipn, daor kuj un bult plezier an beleem. Det plezier kan mangs rap minder wurn. As de kipn de eier kapot pikt en de eierbaste is ok veuls te dunne. Dan denkie toch: wat un amateurs. Ie mun ut voer anpasn, mar daor hef de kipnboer noe kats gien zinne meer in.

Hij hef de kipn al un aorige tied en wul liever ut hele spul opruumn. Hij wul iemand dur wel blij mee maakn, die mag ze zo metnem. Ut mooiste zol ween asse zomar iniens zut det zien kipn vort bint.

Dan bint ze mette num en kan un ander dur zien plezier an beleem. De kipnboer hef al met iemand eproat, die van hem de kipn wel mog hem. Hij hefter wel bie ezeg weurumme offe noe van zien kipn of wol. Veur de eier waarn ze gien zak eweert  mar veur in de soep zoln ze merakel goed ween.  De man die mos luustern nor ut verkooppraotie van de kipnboer zei dette gien belang had bie die kipn. Mar hij kreeg als antwoord det ut plukn en slachten van de kipn un gezellig klussie  veur hem en zien vrouwe zol ween.  Volgens de man zoln de kipn de iene kante van zien huus inkomn en dan zol zien vrouwe as de sotermieter an de andere kante vant huus wegvliegn. Volgens de man kon de kipnboer ut spul better an de kante van un autoweg neerzetn en as die kipn slim genog bint, zult die wel gaon liften en maakn det ze vort komt. Ai dan goed verzekerd bint, kuj deurgeem det oen kipn weggehaald bint. Dan kriej misschien geld veur un nieuw kuppeltie jonge kipn veur de eier en niet veur de soep.

Ton