LEMELERVELD – Un oldere vrouwe hef un huussie op un camping. Zie kumpter nie vake, mar van de campingbaas muj de boel umme oen spullegie netties biehaoln, aans kriej un boete an de konte smeert.  Ut onkruud op ut straotie detter lig, kuj kapotspuitn.  Zie hef  zo’n rugspuite bie ut huussie en wol dur noe eem hen gaon met un hulpe durbie.

Zie zaatn in de auto dur nor toe en toen kwaamp ut mense dur achter det zie ut spuitspul vergetten was. Zie gunk de hulpe machtig aifbekn det hij heur det niet heffe zeg veurdet ze weggung. Nouja dan most mar later. Gewoon deurjaagn noe um spuln op te haaln die vortmossen.  De hulpe hef ut straotie noe helemaol schonemak deur alle voegn uut te krabben en zo ut onkruud weg te haaln undet ze dur noe toch waarn. De vrouwe bedacht zich toen ok nog det heur buurn op de camping felle teegnstanders waarn van gif spuitn op de camping en zie mog dus blij ween det ut onkruud noe op un anders maniere was vortehaald. De buurn zol heur aans wegpestn of zoiets en dan mog zie ok niet meer gezellig kom teutn bie hun.  Ut mense kon better heur rugspuite daor weghaaln, aans kump ze weer in de verleiding um die te gaon gebruukn en kreg ze alsnog trammelant met de buurn. Veur det bettie onkruud wuj det ok niet. De spuln die wegmossen wurn in un karregie elaadn en kon zo nor de auto um aof te voern. Twas un oarig stukkie loopn en veut ut mense zol det te veule ween umdet zie ok gien twintig meer is. Deurum was zie blij det ze hulpe bie zich had. De zooi die wegmos is noe virt en ut onkruud is ok vort zondet gezeik van de buurn. Noe kon ut mense met un gerust hart denken det ze de campingzooi weer trechte hef. Des a weer un zurge minder.

Ton