LEMELERVELD – Un stellegie wol saam met hun zeune eem un paar daagn drop uut. In de plaatse waor ze hen woln, waster genog te bekiekn. Noe mossen ze nog un slaopplekke zien te vin. Um hen en weer te gon jaagn zol niet verstandig ween, want de benzine wurd al maar duurder.

De vrouwe vant stellegie wol gon zuukn of ze nog wat kon vin en heur man gunk ter van uut det wel goed zol komn. Toen ze ankwaam biet huussie, krapn hij zich toch eem achter de oorn, want het was un tiny house ewurn waor ze in moggen kroepn. Det kroepn wurn noe ok nog is letterluk waor. Beneden zag ut net as un ander huusie uut: un zitgedeelte met un banke veur un televisie en un keukentie met un aanrecht en un eettaofel met un paar stoeln.  Boom un slaopkamer met un tweepersoonmatras met weinig ruumte daornaost.  Nog verder nor boom gunk un gang nor un tweede slaopkamer met daor ok twee matrassen op de grond. De gang der nor toe was echter niks te hoge. Ie mossen kroepn, want rechtop loopn of staon koj niet. Deurum zult ze ut wel un tiny house nuum. Ai zelf ok tiny bint hei gien last van zo’n lage gank. Ie zoln denkn un tiney house, dan ok un tiny pries veur det huusie. Mar nee heur gewoon ut  zelfde as veur un ander huusie. Ach twas mar veur un paar daagn en twas zo toch goedkoper as hen en weer jaagn.

Ton