LEMELERVELD – In al die jaorn dek un horloge hebbe had, hek al verschillende banties ehad. Ik heb zo’n bakkie met oale banties. Ak is un ander bantie neudig hebbe, hak wat pruttel op veurraod. Die pennegies waor ut bantie mee ant horloge zit, binter in alle maotn en ai geluk hebt past ut ok nog in oen eign horloge as det mut.

Ach en as det niet zo is, pakkie toch un stukkie iezerdraod. Det kuj zo pas maakn. Dan ut bantie zelf. Mien ervaring is ai van die staoln schakelbanties hebt, kunt die van oen pols knapn ai ant heistern bint zoas holthakn, met un schuppe hard ant spitn of met un hamer hard ant slaon.  Deurum hak ekeuzn veur un leern bantie. Die gaot echter un keer ant scheurn, dus mos ik weer un staoln bantie uut de veurraod haaln. Ja aans kump de veurraod nooit op toch. De schakel die ant horloge mos was un bettie smal en dan gunke steeds hen en weer schoemn. Ik dache ak daor noe an weerskanten un tyrip doe, dan ist geschoef offeloopn. Ai die tyrip dan aofknipt kumpter un bobbeltie en det is gien porum. Nou dan zurg ik det die bobbel an de binkante kump te zitn. Zo gezegd zo edaone. Mar toen ik ut horloge weer umme deed, zat ut bantie noe un bettie te strak met die bobbelties an de binkante. Dan mar weer de bobbelties an de buutnkante.  Tis eem wen met van die bobbelties an ut bantie, mar ut went vanzelf wel op zien tied en die kuj noe mooi biehaoln op ut horloge.

Ton