LEMELERVELD – Un vrouwe hef hulpe bie huus en zie wol graag det de raam an de buutenkante un keer schone maakt zoln wurn. Mar de hulpe hatter kats gien zinne in en daor wasse niete veur ekomn. De vrouwe wol de hulpe de konte wel volscheln, mar det zol ok niet helpn um de raam schone te kriegn.

De vrouwe zat te baaln det heur raam nog steeds gasterig bleem, mar kreeg un idee toen ze later un kerl in huus kreeg die ekomn was um wat in de tuun te doen. De vrouwe vreug de kerl metiene offe wat aans wol doen dan allenig mar in de tuun te knooin.  De kerl wol weetn wat det dan mos ween. Hij kwam te weetn dette de raam an de buutnkante mog gaon lapn.  Hij was dan wel gien raamlapper mar hij had ut wellis edaone. De vrouwe was daor blij mee en begon metiene un emmer, un spons, zepe en un rubbertrekker bie menare te zeukn. De kerl zei dette nog un lappe neudig had um de trekker dreuge te vriem asse strontnat was ewurn.  Toene de hele pruttel had konne begin um de raam schone te poetsen, zodei weer met goed fatsoen nor buutn kon loern. De vrouwe zol dan ok better kun zien wat die kerl in de tuun had trechte knooit. Mensen die an de deure kwaam kon ok better nor binnenkiekn hoe gezellig ut daor was en graag met de vrouwe an de praot woln. Ut hef dus allenig mar veurdeel ai de raam goed schone haolt.

Ton