LEMELERVELD  – Un kerl het a jaorn un imker ehulpn bie zien bieengedoe. Hij is a vake steukn, mar blef gewoon eignwies deurgaon. Umdette ok nog allergies is veur bieensteekn, heffe ait pillegies bie zich die merakel helpt. De imker zei ait det bieensteekn gezond veur oe bint. De kerel dach ait asse det heurn: ‘nou laot ze oe dan mar vake steekn.’

De imker is al in de tachtig en wul zo langzamerhand ut un bettie rustiger an doen met zien bieengedoe. De kerl die hem ait ehulpn hef, dach as ik met de bieen verder wul knooin, mukter meer van aof zien te weetn en gunk op un imkercursus. Hij hef toen un imkerdiploma haalt en is gelieke lid ewurn van un bieenclub die kunt helpn bie vraogn of helpn um probleemn op te lossen. Hij kreeg ok zien eign bieenvolkie waore mee an de slag kon um zien eign honing te kriegn. De olde imker hef tien volken en hij gieter ok nog mee ant reizen. Ja niet op vakantie of zo, mar um meerdere soorten honing te kriegn muj de bieen mangs op verschillende plaatsen neerzetn. Umdet zien vader ok in bieen zat had die kennissen in Nijmegen, Drente en Groningen. De imker hef al die adressen annehaoln en dan muj dus met oen bieen hen en weer ant slepn. Um det de olde imker ut allenig niet meer kan redn, weete deur de veertig jaor dette ant imkeren is waore hulpe kan vraogn. De kerl die a veule hulp gunk meestal met de olde imker op pad, want de kerl mut nog un bult leern. De olde imker kan al die kasn niet meer allenig op de plaatse zetn en as die later vol honing kump te zitn kregge die niet meer op de anhanger.  De kerl hef noe ok zien eign volkie durbie ezet en ja heur later as de raten eslingern wurd kregge un halve emmer vol van zien volkie. Det is dan un goed begin en hoe de olde imker noe verder giet met zien bieengedoe en zien hulpe muw aofwachtn. De kerl die ait hulp, hef noe ien volkie en um dan metiene nog tiene durbie te nemn is wel un grote stap, mar as de oldere imker as vraagbaak en hulpe met blef doen mut ut kun.

Ton