LEMELERVELD – Bie bedriem heb ze vake ok un kantine, waor de luu die op de loonlieste staot as werknemer hun koffiepauze kunt haoln. Teegnwaorig zit de luu, die dan koffiepauze haolt, vake op hun telefoon te klooien. Toen die telefoons dur niet waarn wurn dur in de pauze mangs gezellig met menare ouwehoert of zelfs ekaart.

In ieder geval toen wurn dur nog met menare epraot en dan heurn ie nog is wat. As un bedrief un grote kantine hef met allemaol aparte taofels  kant gebeurn det aster ientie a alenig an un taofel zit, det andern dan an un andere taofel gaot zitn. Dan kuj gaon denkn: weurumme noe. Ach die luu wult de andere taofels niet allenig mar stof laotn verzameln. Of die luu heb un dondersen hekel an die iene collega. Kiek assie un bedrief hebt waor allemaol verschillende afdelings bint,  zult die mensen van dezelfde aofdeling bie menare kroepn. En aster dan weer un collega van weer un andere aofdeling binkump en die giet ok weer an un aparte taofel zitn, kriej toch vraogtekens.

De collega die int begin allenig an taofel zat  kan dan steeds weer bie andere collega’s an taofel gaon zitn. Mar as iederiene die binkimp un eign taofel nemt, blef de eenling mar hen weer schoemn um weer bie un nieuwe binkommer an taofel te gaon zitn. Op die manier krege zien eign koffie ok nog niet op tied op of de koffie is ok nog koud ewunde. Gezelligheid det kumpter of niet ai bie menare an taofel gaot zitn. Mar ut mut niet zo ween det iemand helemaol gien tied hef um gezellig te doen, umdette bekaof is vant hen en weer loopn van taofel naor taofel.